[Gaelle]

Extrait du Traité d'Hippiatrie de Jordanus Rufus (1200-ca1256):

<89> (R. fol.56 v°) Mais por ce que ce quej’ay dit est de la teste, tou laplus
grant part appartient au frain, et por ce convient il que je die la maniere a cellui qui
l’affreinne, la forme et la maniere du frain.
<90> Il est doncques une maniere de frain qui est appelé a barre, pour ce
qu’elle est faite de deuz barres, une du lonc et l’autre du travers. Il est ainsi composé
et fait pour ce qu’il est plus legier et plus able2 que les autres.
<91> Il est encore une autre maniere de frain qui est appelé a demie barre ou a
demi mors. Et ainsi l’appelle l’en en vuogal pour ce que la moitié du mors a une seule
barre de travers et l’autre double partie dessoubz : lequel frain est plus fort et plus
arrestant que l’autre dessus dit.
<92> Et une autre forme de frain aussin, qui a nom a demi mors en françois, de
quoy les falles sont tortices ou plaines, et dedenz le mors du frain sont mis esmaux ou
emmaux, lequel frain est plus fort et plus cruel que tous les autres dessuz diz.
<93> Il est encore une autre maniere de frain qui a nom caralde, et dedenz a
beaucoup de falles dedenz le mors, lequel frein est plus fort et plus cruel de touz ceulz
dessus diz.
<94> Encores il y a unes autres manieres de fourmes de freim, desquelles usent
aucuns provençaux, qui sont horribles et aspres sanz raison, que je laisseray a dire
pour leur cruaulté.