Des sources (textuelles, iconographiques ...) sur l'équipement des cavaliers du début du XIIIème siècle
Avatar de l’utilisateur
Oriabel
 
Localisation: Champigny-sur-Marne
Messages: 1292

Messagede Oriabel » Jeu Nov 08, 2007 9:42 pm

A la Rociele est arivés,
Droit à Nior s'en est alés,
Si a la guerre commencié
Et moult durement efforcié (v.21490)
Contre mon signour Loéys,
Qui remés estoit el païs.
Donques fu pris al pont de Nates,
A tant de gent, jou ne sai quantes,
Robiers, fius le conte de Dreus, (v.21495)
Ki moult estoit vallans et preus.
Et si fu pris à cel anui
Jehans de Lesdaing avoec lui.
Et li fius le roi cevaucha,
Loéys, à mont et en chà. (v.21500)
Plusior des Poitevins tournèrent,
Et plusior od lui demorèrent.
Et quant le sot li rois de France,
Dolans fu de la mésestance
De son couzin, qui pris estoit. (v.21505)
Et, d'autre part, si entendoit
Qu'à Valencienes estoit Othe,
Que li quens de Boulogne asote,
Et Hues de Boves apriés.
Moult par en fu li rois engriés, (v.21510)
Manda sa gent et toute s'ost,
Et il i sont venut moult tost.
Quand il a ses barons véus,
Jusqu'à Douwai s'en est venus,
Et lendemain à Boulain-riu, (v.21515)
Car il i avoit assés liu.
Lendemain à la matinée
Fu toute l'ost aceminée.
Al pont de Bouvines logièrent
Et li Flamenc, qui venut ièrent (v.21520)
A Valencienes, quand le sorent
Consel ont pris, com ains il porent.
Hue de Bove et sa mesnie
Orrent faite une cevaucie
A Bohaing, par le Kambrésis. (v.21525)
Si ont gastet tout le païs.
Et li rois Othe avoit tramis
A Cambrai III de ses amis,
Et lor manda qu'il se tenisent
A lui, et le bourc li rendisent. (v.21530)
Mais cil de Cambrai se tenoient
Al roi, dont le confort avoient.
Nieules d'Arras estoient dedens,
Et s'ot od lui moult bieles gens.
Al roi Othon on remandé (v.21535)
Qu'il se sont au roi commandé
De France, et à lui se tenroient.
Othes et cil ki là estoient,
En furent souple et coureciés.
Del roi leur fu diot et noncié (v.21540)
Qu'à Bouvines estoit venus.
Adont fu leur consaus tenus,
Droit à Mortagne en sont alé,
Outre l'aigue sont ostelé.
Li boins rois Fellipres de France (v.21545)
Vint à Tornai, sans démorance,
Vit le desroi, vit le bestenc,
Que fait i orent li Flamenc.
A Notre-Dame, en sa maisson,
S'en ala faire s'orisson, (v.21550)
Qu'ele le destornast d'anui
Et tous ses barons avoec lui.
A l'aviesprir fu li consaus
Entre lui et ses barons haus,
Quar li boins rois et sa compagne (v.21555)
S'en voloit aler à Mortagne.
Mais tous li plus en demanier
Ne li sorent que consillier.
Quant dite ot cascun sa raison,
Selonc al mious s'estension, (v.21560)
Girars la Truie apriès parla
"Sire, fait-il, vous n'irés là;
Trop i a maus pas et destrois,
Et si a grans vilaites III
Et II rivraites avoec, (v.21565)
C'on ne poroit passer illuec.
Mais retraiiés viers vostre tière,
Et li Flamenc désirent gierre,
Se vous arière repairiés,
Si diront que vous enfuiés, (v.21570)
Et lors vos sivront à desroi,
Com beubancier, sans nul conroi,
Quar cascuns d'aus violt iestre Sire,
Et vous, sans couronne et sans ire.
Commandés boine arière garde, (v.21575)
Si que jà l'os ne s'en esparde.
Et si devisés vos batailles,
Et faites aler vos piétailles
Priés de lors armes pour le caut.
S'ièrent entais s'on les asaut. (v.21580)
Lors si verés Flamens venir,
Ki se metront al couvenir."
Trestout ensi fu otroiié,
C'onques n'i ot de rien broiié.
Dormir s'en vont et reposer, (v.21585)
Et quant çou vint à l'ajorner,
Li rois devisa ses batailles,
Et fist ordener ses piétailles,
Et le karoit et les somiers
Aler avant en dementiers. (v.21590)
---/---
Trestout de la bataille ordené,
Sont viers le pont aceminé (v.21600)
De Bouvines, et tout le pas
Et par consel et par conpas.
Et quant li Flamenc l'ont oï
Durement s'en sont esgoï.
Lues sont trait à I parlement (v.21605)
Si se sont croisié fausement
Et par grant haste sont armé
Et tout lor vilain acesmé.
Ne quidiés que de rien vous mente,
Çou fu main, par I diémence. (v.21610)
Li rois Othe parla premiers,
Com cil ki bien fu coustumiers
De biel parler et sagement.
A tous a dit communalment :
"Signour, diémence est huï (v.21615)
Que nostre Sire a pris sour lui
C'on ne doit ouvrer ne combatre,
Mais reposer, déduire, esbatre.
Jà, se Dieu plest, par si haut jor
N'aurai bataille, mais séjor." (v.21620)
-"Voire, dist li quens de Bologne,
Grant hounour nous fait qui s'eslongne
Li rois de France devant nous.
Or les en laissons aler tous
Huïmais, et priés l'acostons, (v.21625)
Et demain à lui combatrons.
S'en ait l'ounour qui Dieux le donne."
"Ce soit, dist Othe, à eure bonne."
Quant Hue de Boves l'oï :
"Sire quens, fait-il, je vous di (v.21630)
Que vous avés, com mal apris,
Les deniers au roi Jehan pris,
Que nous véoumes as ious tuit
Que li rois de France s'enfuit,
Et vous l'en laisiés sain aler." (v.21635)
"Assés, péussiés mious ouvrer,
Dist li quens Hue, c'est mençogne :
Il n'en fuit pas, s'il nous eslogne.
Jou connais bien le roi de France
Et ses barons et sa poissance; (v.21640)
Il n'en fuieroient mie tel,
Ainc nos feront anqui tot el ;
Et g'ière mors u pris, sans faille,
Comme preudome à la bataille,
Mais vous en partirés fuïant; (v.21645)
Je le sai bien : pour çou m'en vant.
"A tant commencent environ
A rihoter tout li baron.
Et Ferrans et si cevaliers
Se commencent à desrengier, (v.21650)
C'onques n'i ot conroi tenu :
Jusqu'as gens le roi sont venu
Leur arbalestrier abriévé
Maint confanon i ot levé,
Maint quariel trait et maint ceval (v.21655)
Point et estancié contre val.
Mais li arbalestrier le roi
Lor vinrent devant al desroi,
Et li visquens de Meléun
Cevaus i estança plus d'un, (v.21660)
Quar il n'orent talent de fuie.
Avoec lui fu Girars la Truie
Et Girars de Marque et siergant,
Qui partout aloient argant,
Et plusiour François i estoient, (v.21665)
Ki les Flamens bien encontroient.
La Truie s'est d'entr'aus partis;
Al roi s'en vint tous aatis,
Droit en l'atrie de Bovines.
Si mangoit en coupes d'or fines (v.21670)
Soupes en vin, et fist moult caut.
"Truie, dist li rois, Dieux vous saut;
Que font li Flamenc? Vienent-il?"
"Sire, Dieux vous gaart de péril,
Dist la Truie, et si vos armés, (v.21675)
Comme preudom, et acesmés,
Quar nos aurons jà la batalle.
Vés-les-ci priés de nous, sans falle."
Dont ora li rois viers le ciel,
De cuer, sans amer et sans fiel, (v.21680)
Et dist : "Jhésu-Crist, Fius et Père
Et St-Espirs, ki tous nos père
Et tous nos fais morir et vivre,
Vrais Dieux, hui eest jor me delivre
D'anui, d'encombrier et de mal, (v.21685)
Et çaus à piet et à ceval,
Que j'ai avoec moi amenés,
Et ma couronne soustenés.
Et vous, sire St-Denis, hui,
Qui om de ma teste jou sui, (v.21690)
Gardés ma couronne et mon cief,
Que n'i soïe mis à mescief.
Vous devés garder la couronne,
Quar cascuns rois siervage i donne,
Si com devisa Charlemainne, (v.21695)
Et jou sui vostre om en demainne.
Si gardés m'ounour et mon droit,
Quar vous le devés al destroit.
Et vous, dame Sainte-Marie,
Guardés que ne soit hui marie (v.21700)
Ma compaigne, ne destourbée,
Ne ma couronne desreubée."
Lors joinst ses mains, garda el ciel
Et puis fist apieler Mikiel
De Harnes, s'el baissa en foi, (v.21705)
Et dist qu'il fust le jour od soi.
Et si baissa Girart la Truie,
Et proïa qu'od lui se déduie.
Guillaumes des Bares huça
Et moult doucement le baissa, (v.21710)
Et pria qu'il l'égart en fin.
Si baissa Piéron Malvoisin,
Et Mahiu de Montmorenci.
Et lors I petit s'avanci,
Et par le consel de sa gent (v.21715)
Si a fait bailler esranment
L'oriflambe de St-Denise
A I cevalier par devise;
Wales de Montegni ot non,
Qui moult estoi de grant renon; (v.21720)
En foit l'en a baisiet li rois.
Puis fist ratorner ses conrois,
Car jà en i ot de logiés
Outre le pont, et par congiés.
Et li Flamenc tout desrangié (v.21725)
Se furent jà tout aprocié,
Qu'en l'arière garde férirent
Et durement s'i combatirent.
Et li autre vinrent esrant
Apriés la bataille férant. (v.21730)
Renaus, qui fu quens de Bologne
Se fu armés, point ne s'eslonge
Sor I destrier qu'il ot ferrant
Vint apriés le conte Ferrant;
Et li dus de Lembourc apriés, (v.21735)
Et li dus de Louvaing engriés,
Et dont apriés li quens de Lus :
Cil n'i quist sounes ne délus;
Et Biernars, li preus d'Ostemale,
Et Conras de Tremogne avale, (v.21740)
Et Hainnuier et Braibençon,
Tous i vienent par contençon;
Si fu Guillaumes Longe-espée.
Mainte ensegne ont desvolepée.
Et apriés si vint li rois Othe, (v.21745)
Que li quens de Boulogne asote.
Quant li roi sot la vérité,
Que pour tolir son ireté,
Vienent sor lui li faus reté,
D'orguel et non d'umilité, (v.21750)
Pour tolir sa prospérité,
Tout son voloir ot endité.
L'oriflambe rouva drécier,
Puis commanda à cevaucier,
Et li siergans plus aprocier, (v.21755)
Et l'arière-garde avancier,
Pour férir de priés, et lancier
As Flamens, qui sont beubancier.
Çaus d'entour lui a apielés,
A diestre et al seniestre lés, (v.21760)
Et dist li rois, comme preudom :
"Signour, jou ne suis c'uns seus hom,
Qeus que soie, rois sui de France;
Garder me devés sans fallance;
Or me gardés, si ferés bien, (v.21765)
Quar jà par moi n'i perdrés rien.
Or cevauciés, jou vos sivrai,
Et partout, apriés vou, irai."
Lors si a fait sonner ses trompes
A grans alainnes et alonges. (v.21770)
Moult sounèrent bien les airainnes
Et haus as deus fois premerainnes
Pour sa bataille plus douter,
Et fu moult biel a ascouter.
Mais lues que l'oriflambe virent (v.21775)
Li Flamenc, et lues qu'il oïrent
Sonner les trompes, si tornerent,
Quar le roi durement douterent.
Et non pourquant venu estoient,
As Canpegnois se conbatoient, (v.21780)
Qui les tenoient ja as frains.
Bien jousterent as premerains.
Watiers, li castelains de Raisse.
Avant les autres s'i eslaisse,
Et Estasses de Maskeline (v.21785)
Sour I ceval de grant ravine;
S'i vint Bauduins Buridans
Con cevaliers preus et aidans.
Si vint broçan Rasses de Gavre,
Et apriés lui Sohiers de Wavre, (v.21790)
Qu'ainc n'i ot batalle ordenée;
Tout i vinrent a randounée.
Le roi quidièrent à la fuite,
Mais il le trouvèrent a luite.
Li quens Ferrans sour I destrier (v.21795)
Fu montés al senestre estrier
Et vint apriès les plus sovrains;
Et non pourquant as premerains
Fu pris de Huon de Maruel.
Entour lui ot moult grant aquel (v.21800)
N'i ot François, le sien n'ahate
Tous les ont mis a le barate.
Ferrant ont pris et son orguel :
Et, se verté vous dire voel,
Li quens de Boulogne Renaus (v.21805)
Se féri de plain vol en aus,
Si come li faucon gentius
A la rivière est ententius
Pour faire as oissiaus griés asaus.
Bien s'i prouva comme vasaus, (v.21810)
A la gent Jehan de Niièle.
Maint bon ceval lor esboiele,
De sa lance fist maint astièle.
Mais ne lor vaut une cenièle;
Quar Rousiaus, I sien cevaliers, (v.21815)
Qui moult estoit preus et manriers,
Al conte Renaut s'amella,
Son ceval li esbovela,
Et li quens est céus a tière.
Mais, com om qui moult sot de gierre, (v.21820)
En séant se prist a desfendre
Si bien que nus ne l'osa prendre.
Et Roussiaus, ki fu de pooir,
Se laissa parmi lui céoir.
Tant i luitièrent et torsèrent (v.21825)
Que le conte pris enmenèrent,
N'ainc uns des siens aler n'en pot,
Mais Rousiaus moult grant los en ot.
Mesire Jehans de Niielle
Maint hiaume à or i desniiele, (v.21830)
S'il fu grans, teus cos i feri,
Con à si fait cors afféri.
Souvent öissiés à grant joie
Nos François escrïer "Montjoie".
Et li plusiour crïent "Bologne"; (v.21835)
Mais li quens iert pris qui s'eslonge ;
Et li autre crïent "Hainnau",
Quar Ferrans i ot d'amis pau.
Tirant en fu menés as loges,
Mious li venist estre a Limoges. (v.21840)
Desous I car fu desarmés,
Avoec à C siergans remés.
Et li rois vint à la batalle,
Çainte ot l'espée, qui bien talle.
Ses arainnes fist haut sonner (v.21845)
Pour les Flamens a estouner;
Quar pour le son tant seulement
Perdirent-il leur hardement.
Li Avalois hucent "Coulogne",
Li dus "Louveng", Conras "Tremogne", (v.21850)
Et li rois Othe, à la par soume
Vint aproçant et cria "Roume".
Et Biernars, ses compains, avale
Criant II fois "Ostemale";
"Lembourc" vint escriant li dus, (v.21855)
Mais tost i fu ses cris perdus.
Et Hainnuier et Braibençon
Vinrent courant à contençon.
Maint ensègne öissiés crier
Et maint tronçon par l'air voler, (v.21860)
Et s'i ot ocis maint ceval.
Et, par amont et par aval,
Escus et hiaumes reluisans
Véisiés moult gesir ès kans.
Tant en avoient li ribaut (v.21865)
Qu'il en estoient liet et baut.
Et huçoient à grant alainne,
Quant on avoit souné l'arainne :
"Montjoie Dieux et sains Denis.
Ferrans iert fierés et honnis". (v21870)
Les commugnes et li siergant
Vinrent a l'estour atiergant,
Tüent Flames, tüent Englois,
Hainnuiers, Sesnes, Avalois;
Et quant on escrie "Montjoie", (v.21875)
N'i ot Flamenc qui n'asoploie.
Quant il eurent le jour coisi,
Boucars et Gui crïent "Oizi"
Avoec l'emperéour Othon
Si haut que tres bien les ot on. (v.21880)
Iréément, lances sor fautres,
Vont asanbler li I as autres.
Li quens Guillaumes-Longe-Espée
Fu retenus à la menlée.
Et li quens de Lus délüés (v.21885)
Fu lues apriès et desnüés
De rices armes k'il avoit,
N'i ot François qui ne couvoit
A souprendre les faus croisiés.
Moult abatent des plus proisiés. (v.21890)
Des Campegnois n'i ot celui,
Qui ne face Flamens anui.
A fait k'il viènent à l'estour,
Lor aprendent François I tour,
Que de ceval vont a karaite (v.21895)
Pour le roi ki de tort les raite.
Li castelains de Maudangien
Fu retenus, s'el fist moult bien,
Et plusiour des millors Flamens
Furent pris, quand vinrent as rens. (v.21900)
Maintes fois oïssiés le jour
Crïer "Montjoie" sans séjour.
Cis mos esmaïa les Flamens,
Cis mos lor fu painne et tormens,
Cis mos les a tous abauvis, (v.21905)
Cil mos abati blans et bis,
Cil cris les esmaïa si fort
Que foible deviènent li fort,
Et li hardit furent couart.
Les cies tornèrent d'autre part, (v21910)
Et quant l'ensègne St Denise,
Fu deviers aus drécie et mise,
Si leur sanbla que St Denis
Euist deseure I dragon mis
Pour aus ocire et dépecier. (v.21915)
Lors n'orent talent de kacier,
Ainc se misent tout à la fuite,
C'onques François n'i fisent luite.
Mais cil ki furent ahati,
Ne sont pas des François parti. (v.21920)
Ainc furent pris, ça dui, ça troi,
Come li oissillons au broi;
Et li cauf et li kiévelut
I furent englüé sans glut.
Li dus de Louvaing s'en parti, (v.21925)
Quar n'éuit pas le giu parti.
S'Othes avoit sa fille éue,
La fille au roi estoit sa drue,
A feme l'avoit espousée
Ainc la guerre li fu donnée; (v21930)
Si n'ot cure del roi gréver
Pour Othon auques alever.
Partis en est, et sa gent toute
Apriés en vait une autre route.
Li dus de Lembourc vait apriés. (v.21935)
Hues de Boves, li engriés,
N'i osa très dont arester,
Qu'il vit les François aprester
De leur ounour à détenir
Et les plus cointes retenir. (v.21940)
Et quant il a véut l'ensègne
St-Denis, as Flamens l'ensègne,
Sa grant paour point de lor çoile,
Quar effondre ne le tonnoile
Ne crient-il tant comme le roi. (v.21945)
Fuiois s'en est od son conroi,
Al plus tost qu'il pot s'en eslogne,
Si qu'ot dit li quens de Boulogne,
Quar il connissoit le roi bien.
Lors s'en vint cil de Sotengien (v.21950)
Et cil de Bourgiele batant.
Mais François en vont abatant,
Assés en prisent et ocient,
Tant que St-denis en miercient.
Dont fu pris Watiers de Kiévraing (v.21955)
Et Ernous d'Aisne et ses compaing,
Que li rois ot autrefois pris.
De sa guerre s'en orent pis,
Quar il avoient fourjurée
Toute la gierre et l'asanblée, (v.21960)
Que sor ceval ne monteroient,
Et, pour çou, sour jumens séoient.
Ki véist le duc de Bourgogne
Com il féroit à tel besougne,
Bien li péuist menbrer d'Ogier (v.21965)
Quar il n'i quéroit nul dangier,
Ainc feroit cos pour desmembrer :
Li Ponhier et li Campignois
I furent preut, et cil d'Artois
Et li Hurepois d'Outre-Sainne (v.21970)
Ne leur font pas menlée sainne.
Cil d'Aminois et de Pontiu
Tinrent bien d'autrepart lor liu.
Painne auroit à nommer tous çaus
Qui bien furnirent lor encaus; (v.21975)
---/---
Mais li François s'on dire l'ose, (v.21990)
Sont de tous cevaliers la rose.
Rasse i fu pris, li preus de Gavre;
Et Sohiers, li sire de Wavre,
D'une lance, tout en apiert, (v.21995)
Ocist Tumas de Mongonbiert.
Pières Harpins, siergans le roi,
Remest ocis à cel desroi.
Si fu mors Robiers de Dici,
C'onques ni pot avoir mierci; (v.22000)
Et Estases de Maskelines
I fu de II lances sapines
Abatus et viersés entr'aus :
Esbovelés fu ses cevaus,
Et Estases i fu estains, (v.22005)
Qui viunt asanbler premerains.
Avoec le castelain de Raisse.
Bauduins Buridans s'eslaisse,
As François maint cop a douné,
Mais bien li ont gueredouné. (v.22010)
Cil de Flamens qui mioust le fist,
Ce fu Buridans, si c'on dist.
Et cil de Gavre, ainc qu'ocis fust.
Par l'estour oïsciés maint fust
Croissir et maint chevalier braire, (v.22015)
Et maint ceval à la mort traire,
Mais tous les François avanci.
Mahius, cil de Montmorenci
Qui que s'enfuie ne ki faille,
Cil brissé et perce leur bataille. (v.22020)
Que vous iroie-jou contant?
Des François li fisent bien tant
Que jou n'en sai les qeus blasmer,
Mais moult les doit li rois amer.
Othe, li rois, à grant compagne, (v.22025)
Avoec lui sa gent d'Alemagne,
Vint cevauçant devers le roi.
Mais bien le connut al conroi
Girars la Truie et raviza.
Au roi vint, si li deviza (v.22030)
Que li rois Othe cevauçoit,
Pour venir à lui s'aproçoit.
"Truie, dist li rois, ù est-il?
Connissiés-le vous?" "Sire, oïl;
Quar il porte, ce n'est pas fable, (v.22035)
L'escut d'or à l'aigle de sable
Et les banières autreteus.
Il mïsmes par est trop preus ;
Mais li destourber le poroit
Enson venir, moult nos vauroit." (v.22040)
"Alons, dist li rois, cele part."
Girars la Truie a tant s'en part;
Quar li rois congiet l'en douna,
Et il a Dieu se coumanda.
Lance baiscie, l'escu pris, (v.22045)
Com cevaliers d'armes espris,
Vint au roi Othon asanbler,
Qu'en treize pièces fist voler
Sa lance, et puis traist le coutiel.
Le ceval feri el cierviel (v.22050)
Parmi l'uel seniestre tot droit,
U sus l'emperères séoit,
Et lues l'a saissi par le frain.
Li rois Othe pour son reclain
Cria "Roume" trois fois, s'ensègne, (v.22055)
Si com proaice li ensègne.
I coutiel ot moult rice a pointe,
D'acier iert l'alemiele jointe;
La Truie en douna si grant cop
Qu'il ne le tuint ne pau ne trop. (v.22060)
Quar li cevaux buisnoit del cief,
Si qu'Othe en estoit a mescief.
Este vous lues venu a tant
Guillaumes des Bares batant,
Le roi Othon a resaissi. (v.22065)
Pières Mauvoisins l'a ceusi,
Si l'a repris de l'autre part.
Et li rois Othe leur repart
Cos et colées a lagan,
Qu'ainc tant n'en orent en cel an. (v.22070)
Biernars d'Ostemale tous seus
Et Hellins de Waurin, li preus,
Brocent entr'aus des esporons
Sor les cevaus, qu'il orent bons.
Biernars fu venus a seniestre, (v.22075)
Et Hellins de Waurin a diestre,
Le frain li font voler des puins,
Ausi com i ferist a quins.
Li rois Othe en fu delivrés,
Mais il i sont andui remés. (v.22080)
En liu d'Othon prisent Biernart
Et Hellin de Waurin en part.
L'emperère a tant s'en torna.
Guis d'Avesnes le destorna
Fors de l'estour, si descendi (v.22085)
De son ceval, plus n'atendi.
"Sire", dist il au roi Othon,
"Vos cevaus muert, bien le set-on,
Sa cierviele li ciet à tière;
Et vous serés jà pris de gierre, (v.22090)
Se vous ne montés sor le mien."
"Biaus sire Gui, vous dites bien",
Dist Othe, "la vostre mierci".
Tout esranment si descendi,
Sor le ceval Guion monta; (v.22095)
Le roi de France moult douta.
Volentiers r'alast à l'estour,
S'il ne doutast lui et s'atour.
Gui d'avesnes ne li laissa.
Et li rois Othe s'en tourna (v.22100)
Tous coureciés et abosmés;
Poi l'ama mains qu'iestre remés.
Tornés en est à poi de gent.
Et Guis monta, voïant aus C,
Sous le ceval son esquier, (v.22105)
Pour l'emperéour convoiier.
Mais par l'escuméniement
Estoit-il à destourbement.
N'onques mais n'ot-on oï dire,
D'emperéour à entredire, (v.22110)
Mais çou fist la pape Innocens
Pour les droits St-Pière et ses cens.
Quant de l'estour s'en fu partis
Li rois Othe, grains et matis,
Dolans en fu, bien le vos di, (v.22115)
Et ses cevaus plus n'atendi.
Devant ses ious caï mors jus,
Quar el cierviel estoit férus.
Pour cevaucier et mont et val
N'avoit el mont si bon ceval. (v.22120)
Ensi de grant ire matis
S'en est li rois Othe partis.
Guis d'Avesnes l'en a mené
A loi de cevalier sené.
Atant, j'el di trestot de fi, (v.22125)
Furent li Flamenc desconfi.
Mais I poi de siergans à piet,
Qui bien s'estoient arengiet,
S'i tenoient comme preudome.
Ernous d'Audenarde en la somme (v.22130)
Fu pris entr'aus et retenus.
La Truie s'i est embatus;
Si li ont son ceval ocis,
Mais il les a II fois partis.
Tant i féri Girars la Truie (v.22135)
Que plus de C en mist à fuie.
Cele part fu grans la batalle,
Ernous i fiert, Ernous i malle,
Audenarde crie souvent,
Et, bien vou di-je par couvent, (v.22140)
K'I Ernous en fu à tort blasmés,
Qu'en bien faisant i fu remés.
Avoec le signour d'Audenarde
Fu pris, ainc qu'il s'en donast garde,
Hues de Wastines esrant; (v.22145)
Et Girars la Truie Ferrant
Son ceval i laissa ocis.
I siens cevaliers, j'en suis fis,
De son ceval est descendus,
A la Truie s'en est venus, (v.22150)
Si le fait monter sour le sien,
Dont il fait s'ounour et son bien.
Girars de Grinbierges atant
I fu pris et menés batant,
Et maint autre, que jou ne puis (v.22155)
Nommer, car el livre n'es truis.
Et non pourquant seroit détris
A nommer tans cevaliers pris.
Mais plus en i eut de CC
Ki paiièrent al roi son cens. (v.22160)
Li rois ot aproismié l'estor,
Et ses gens li furent entor.
Pour leurs cors et pour siervir lui,
Vorrent estre n'i ot celui.
Priés de lui s'i priésèrent tant, (v.22165)
L'une eure arière l'autre avant,
Que li cevaus le roi fondi.
Li rois en céant descendi,
Mais il fu remontés si tos
Qu'à painnes s'en perciut li os. (v.22170)
Viers Othon voloit cevaucier,
Pour çou qu'il le vit aprocier.
Mais on li dist qu'il s'en aloit
Et que demorer n'i osoit.
Encor estoit grans, en la place, (v.22175)
Ça li estours et çà li kace.
Boucars d'Avesne ot esté pris,
Mais il a ses gardes soupris,
Fuiois s'en est parmi I blés
Ausement com s'il fus enblés. (v.22180)
Et plusiour autre en escapèrent
Qui d'esporons cevaus frapèrent,
Et plusiour ausi par consence.
Caut fist et biel cel diémence.
Li I sont pris, li autre fuient, (v.22185)
Et no François moult se déduient
A siergans prendre et cevaliers,
Houbiers et hiaumes et destriers,
Siergans à piet et cras bourgois,
Kars et karaites et harnois, (v.22190)
Bouges et males et soumiers,
Vascelemente, dras, deniers,
Quar tout s'en aloient fuïant
Et li François apriés huant.
Ensi fu la bataille faite (v.22195)
Li rois fist corner la retraite,
Al pont de Bouvines loga.
Cascuns son prisson li mena.
Gardé furent et lendemain
Furent mené viers Dowai main, (v.22200)
---/---
Et li mort furent entieré
A Cizoing, et tout li navré
Si furent mené viers Douwai,
Et plusiour aillors, bien le sai.
A Douwai giut li rois a nuit (v.22225)
Et si prisson, qui k'il anuit.
Lendemain a tous ses conrois
Cevauça viers Paris li rois. (v.22228)

Avatar de l’utilisateur
Louis de Blois
 
Localisation: PARTHENAY-DE-BRETAGNE
Messages: 300

Messagede Louis de Blois » Ven Nov 09, 2007 9:08 am

Super merci Catherine.
« Delays are always dangerous when things are ready. »
Hugues de Boves le matin de la bataille dans « Flowers of History » de Roger de Wendover


Retourner vers Milites equites

Qui est en ligne

Utilisateurs parcourant ce forum: Aucun utilisateur enregistré et 5 invités